Tunhnai khan youtuber hrang hrangin opinion poll an la a, mipuite hmuh theiha an tarlan ah chuan MNF party candidate Dr. R Lalthangliana a sang fal hle a, he opinion poll hi a rintlak leh tlakloh erawh fiahin a awm thuai dawn a ni.

Kar kalta khan Dampa bial khaw hrang hrangah youtuber channel en hlawh tak tak pa nga chuan mipui ngaihdan an la khawm a, heta result tarlan te chu awih mai lo turin ZPM candidate Vanlalsailova chuan October ni 3, kar liamta zirtawpni a Phuldungseia Dampa bial ZPM West Block conference ah a sawi chhuak a. Opinion poll avanga chiai mai lo turin an party mite a fuih a ni.

Vanlalsailova chuan, "General Election-ah khan W. Phaileng opinion poll-ah ka hniam a, mahse, vote kan thlak a, result-ah erawh chuan pakhatna ka ni leh bawk si a. Chuvang chuan kan bial mipuite ngaihdan a ni lem lo tih hi lo hria ula," a ti a ni.

Zoram Today hriat danin youtuber mipui ngaihdan la tu channel panga Zamzo, Nuaithang, Khawthlang Pa, Runmawi leh MS Collection zingah MNF party awn lam nei pahnih an awm niin a hria a, chutihrualin, heng youtuber pa ngate’n mipui ngaihdan an lakkhawm ah MNF candidate tur Dr R Lalthangliana a sang fal hle niin hmuh theih a ni thung.

October ni 3 a Dampa bial ZPM West Block Conference PWD Minister Vanlalhlana chuan telpuiin, thu a sawi a, “Tunah hian ZPM sorkar chuan Pukzing- Silsuri kawng truck kal theihna kawng siam turin hma a la mek a ni, NESIDS atangin pawisa pawh hmuh vek a ni tawh, Vanlalsailova hi tling leh lo se, ngaihtuah nawn leh a ngai ang, Pu Sailova kan thlan tlin loh chuan kan bial hmasawnna kal mek te pawh hi ngaihtuahnawn leh a ngai maithei,” tiin a sawi a.

October ni 4 khan West Phaileng ah PWD Minister thusawi hi chhanglet in MNF Sr Vice President leh Dampa bial MNF candidate Dr. R Lalthangliana chuan, “Kalphung thar tha zawk leh mipui sorkar siam tura an intiam nasat hle laiin; PWD Minister-in a campaign-naah Dampa bial mipui a vau kha a thalo takzet a ni,” a ti a.

“Bial hmasawnna tura hmachhawp mek, Pukzing leh Silsuri inkar kawng, NESIDS sum atanga a siamna tur awm sa leh siam tum mek pawh ZPM candidate a tlin loh chuan ngaihtuah nawn leh a ngai ang, tia a sawi hi Dampa bial mipui hmuhsitna leh tham lohnaah ka ngai a, sorkar thuneihna hmanga mipui rahbehna lian tak a ni. Hetiang hi democracy rama thil thleng atan thil tih chi loh tawp a ni a, mipui inchung tlaka invauna tawngkam hmang tawhlo turin sorkar ka ngen a ni,” a ti.

INC candidate leh an Vice President John Rotluangliana pawhin October ni 7 hian Tuahzawl ah PWD Minister Vanlalhlana thusawi a chhang let ve bawk a.

“ZPM Party PWD Minister in Pukzing leh Silsuri inkar kawng siamna tur mipui vauna atana a hman hi ZPM sorkar ta a ni lo, Central atanga lo kal a ni. Vote zawnna atana in vauna hmanrua tur a ni lo, a tul a nih chuan Delhi tlang thlengin ka kal dawn. Nangmahni chhan tur che u in ka lo kal. Congress party bil MLA tura lo kal ka ni lo, Dampa bial leh Mizoram tana MLA, Congress, MNF, ZPM leh BJP te tana lo kal ka ni,”  John Rotluangliana chuan a ti.

2023 MLA Inthlan khan MNF candidate Lalrintluanga Sailo khan vote 6218 a hmu a, ZPM candidate Vanlalsailova hian dawtin vote 5926  hmuin Pu Lalrintluanga Sailo hi vote 292 in a chak a ni.

INC candidate tuna BJP candidate nita Lalhmingthanga hian vote 3146 hmuin BJP candidate Vanlalhmuaka’n vote 2060 a hmu.

Tunah hian candidate tin te an ṭang hlawm hle a, party hrang hrang hruaitute pawh programme siamin an buai hle bawk. Eng result nge rawn chhuak ang tih chhanna chu November ni 14 ah hriattheihin a awm dawn a ni.